陳佛好 - 她的一生

阿媽生於1930 年一個東莞嘅農村，當時嘅東莞只有農田，冇高樓。阿媽同一個哥哥、一個家姐一齊長大。 佢哋受過第二次世界大戰嘅蹂躏。耐唔耐，阿媽都會講返跟公公走空襲嘅惶恐。

19歲嘅時候，阿媽盲婚嫁咗俾爸爸，一個被疼錫嘅孻女，嫁入一個陌生嘅家庭，當時阿媽嘅徬徨，可以想像。 好在丈夫對佢好好，不過呢啲係後話嘞。

五、六十年代阿媽住喺灣仔石水渠街，喺嗰度佢生咗五個仔女。 加埋奶奶有七個仔女同住，一個不足300尺嘅單位，最迫嘅時候，住咗16個人。

初期冇洗衣機、雪櫃、電話，家務由朝做到晚。 真係唔知點解，阿媽仲有時間，星期六帶我哋去跑馬地或者維多利亞公園。 「去公園」呢啲家庭時間，對我哋嘅成長好重要。 阿媽仲有時間帶我哋五個去考學校啦、為我哋預備飯盒啦⋯⋯唔知阿媽一日有幾多個鐘？

到咗六十年代，我哋搬咗去牛頭角廉租屋，雖然要適應新環境，而且交通不便，但係空間多咗。 喺牛頭角阿媽生咗第六個細佬哥。當時經濟拮据，阿媽要做好多工作去幫補家計。 收入比較好嘅，係車鞋面，所以阿媽就學用大摩打車嘞。

自己雖然窮，阿媽都會毫不猶豫咁，支持比佢更有需要嘅親戚。 佢嘅親戚都好感激佢，但係未必個個都可以想像，佢有幾困難，先至可以籌措接濟其他人嘅物資。

七、八十年代，仔女出身之後，家庭嘅經濟就較為好轉。 九十年代初，爸爸同阿媽可以開始享受生活嘞。可惜爸爸喺1997年過身，冇法同阿媽享受晚年。 爸爸去世之後，阿媽參加咗老人中心，學到好多嘢，生活好充實，除咗學英文之外，下面會講出其他兩個例子。

阿媽好鍾意學新嘢，而且學得好快。 喺老人中心佢學識打枱波，佢經常可以連續入球，而且好有戰略計算，佢會計算邊個波要留返喺枱面，邊個波要先打，運籌帷幄，一絲不苟。 佢都可算係「八十後」嘅枱波高手啦。

近年阿媽又鍾意玩魔力橋，基本上日日都玩，瞓着覺都玩，佢過身之前嗰日都仲有玩，喺強力嘅止痛藥令佢昏睡嘅時刻，佢仍然努力睇我哋嘅牌，嘗試提議我哋點出牌。 一個月前佢仍然可以諗到非常複雜嘅出牌組合，同場嘅仔女都諗唔到嘅，並無誇張。 阿媽肯定係「九十後」魔力橋高手中嘅高手。

阿媽今年六月一日受洗，接受基督嘅救贖。 有好多例子可以證明佢嘅信仰係堅定嘅，其中一樣就係佢再冇皺眉頭嘞。 佢又會經常做祈禱嘅手勢，祈求天父帶領。

回顧阿媽嘅一生：由一個受過很少正式教育嘅農村女孩，自我增值至一個有知識、計算精密嘅老年人。 經歷貧窮，帶大六個仔女，無私咁為家人、親戚奉獻一生，到後期享受佢努力嘅成果， 個個仔女融洽相處，到最後仲得到心靈上嘅救贖。

離別雖然傷心，但係阿媽尚算幸福，佢臨終前受痛苦嘅時間唔算長， 六個仔女、新抱、女婿、孫、息[讀蝨] 親蜜咁陪佢行咗最後一年，尤其是最後一個月，樂也融融。 佢安然、喜悅咁走佢人生嘅最後一程，仲能夠如願與丈夫合葬，圓滿咁走完佢豐盛嘅一生。

雖然阿媽已經去世，但係佢仍然生活喺我哋每一個人嘅生命裏面⋯⋯

陳佛好子女回顧母親的一生